مجھ سے پہلی سی محبّت میرے محبوب نہ مانگ

 

میں نے سمجھا تھا کہ تو ہے تو درخشاں ہے حیات 

تیرا غم ہے تو غمِ دہر کا جھگڑا کیا ہے 

تیری صورت سے ہے عالم میں بہاروں کو ثبات

تیری آنکھوں کے سوا دنیا میں رکھا کیا ہے


تو جو مل جائے تو تقدیر نِگوں ہو جائے 

یوں نہ تھا میں نے فقط چاہا تھا یوں ہو جائے


اور بھی دکھ ہیں زمانے میں محبّت کے سوا 

راحتیں اور بھی ہیں وصل کی راحت کے سوا


ان گنت صدیوں کے تاریک بہیمانہ طلسم

ریشم و اِطلس و کمخاب میں بُنوائے ہوئے

جا بہ جا بکتے ہوئے کوچہ و بازار میں جِسم 

خاک میں لِتھڑے ہوئے خون میں نہلائے ہوئے


جسم نکلے ہوئے امراض کے تنوروں سے

پیپ بہتی ہوئی گلتے ہوئے ناسوروں سے

لوٹ جاتی ہے ادھر کو بھی نظر کیا کیجے

اب بھی دِل کش ہے تیرا حُسن مگر کیا کیجے


اور بھی دُکھ ہیں زمانے میں محبّت کے سِوا